Plantun de Prouvènço

Pèr coumpara dos planto d'encò nostre

Elymus caninus & Aegilops cylindrica

Elymus caninus

Poaceae Graminaceae

Noms en français : Chiendent des chiens, Froment des chiens.

Descripcioun :
Planto en mato, emé de fueio pulèu larjo (4-10 mm), bèn verdo, que porton quàuqui long péu dessubre e pas dessouto (fotò). I'a d'auriheto à la baso de la fueio e uno lengueto merletado (fotò). L'espigo fai de 5 à 20 cm emé 5 à 14 espigau (de 2 à 7 flour) que la glumo èi de l'autre coustat de la cambo. Aquesto glumo porto uno aresto de 3 à 5 costo (fotò). Li lemma porton, éli, uno longo aresto peréu (1 à 2 cm).

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Grando erbo
Taio : 30 à 90(120) cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Elymus
Famiho : Poaceae
Famiho classico : Graminaceae
Tribu : Triticeae

Coulour de la flour : Verdo
Petalo : ges
Ø (o loungour) flour : Pancaro entresigna
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun

Liò : Prado umido - Ribiero - Colo - Basso mountagno
Estànci : Subremediterran à Subaupen
Couroulougi : Boureau
Ref. sc. : Elymus caninus (L.) L., 1755 (= Roegneria canina (L.) Nevski, 1934 )

Blad-dóu-diable(-di-long)

Aegilops cylindrica

Poaceae Graminaceae

Nom en français : Égilope cylindrique.

Descripcioun :
Aquéu blad-dóu-diable vèn de Turquìo e se pòu trouba d'eici d'eila dins li champ e lis escoumbre. Aleva noste relarg d'auto Prouvènço èi pulèu rare. Se recounèis à sa longo espigo que fai uno meno de cilindre de 4 mm de diamètre. Lis arèsto di glumo e di lemma soun courteto à la baso e loungarudo au soumet de l'espigo. Coumpara amé Aegilops ventricosa que ié sèmblo, mai que lis espigueto soun pu redouno.

Usanço :
Li blad-dóu-diable soun proche dis àvi fèr de nòsti blad cultiva. Soun adounc bon à manja, mai sara un pau long pèr n'en acampa li grano. Èron acampa en Sicilo à passa tèms.